昔日東方政情：鄧炳強逛書展 買習近平葉劉著作
保安局局長鄧炳強上月底匆匆上任，既要熟習新崗位，又要出席立法會會議，真係忙到冇停手，但正所謂偷得浮生半日閒，鄧Sir同好多香港人一樣，都鍾意去灣仔會展行吓書展同買吓書，吸收吓新知識，順便刺激吓經濟。
結果鄧Sir尋日到書展一口氣買咗6本書，大家估吓佢買咗邊位名人嘅著作呢？開估，其中3本係議員葉劉淑儀寫嘅，唔通想向同樣做過保安局局長嘅葉劉取經？
至於另外3本，就係國家主席習近平撰寫嘅著作，分別係《習近平談治國理政第一卷》、《論中國共產黨歷史》同《論堅持全面深化改革》，鄧Sir做咗局長之後，視野果然更上一層樓。
往不同紀律部隊攤位打氣
之後，佢仲去咗同喺會展舉行嘅教育及職業博覽，探訪紀律部隊嘅招募攤位，了解吓情況，佢絕對唔偏心，唔單止探訪舊同袍、警隊嘅攤位，亦到訪入境處、海關、懲教署同消防處嘅攤位，一於為所有紀律部隊人員打打氣。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
