昔日東方政情：葉劉出新書 官員拉大隊捧場
唔少政界人物都會趁書展推出自己嘅著作，議員葉劉淑儀近10年來，每年都會出版兩本新書，尋日佢就親赴書展場地同讀者見面，仲有政府官員拉隊去捧場，都可謂畀足面子啦。政務司司長李家超、財政司司長陳茂波、發展局局長黃偉綸、公務員事務局局長聶德權、商務及經濟發展局局長邱騰華等官員都撥冗光臨，葉劉十分感動咁話。
期望施政見解能啟發政府
至於今年嘅著作，葉劉話一如以往，一本係教英文，另一本係評論香港社會發展。佢話感覺到香港經歷大亂之後，社會逐漸穩定，相信香港亦會走向光明。葉劉話前來捧場嘅官員不但買書支持，佢哋都有閱讀內容，例如運房局局長陳帆關注書中有關劏房及港鐵嘅建議，教育局局長楊潤雄就對一篇剖析教育嘅文章印象深刻，仲要求佢喺文章嗰頁簽名添。葉劉話感到欣慰之餘，亦衷心期望自己嘅見解能夠啟發特區政府、改善施政喎。之不過，葉劉貴為行政會議成員，平時唔係已經可以就政府施政提出見解咩？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
