政情：回想讀法律辛酸 王桂壎曾灑男兒淚

王桂壎憶起當年，佢打政府工剛啱做滿兩年就收到一份通知，話政府會給予公務員獎學金攻讀法律。王當時見機會難得，於是要求佢嘅英籍上司喺申請表上簽名，誰知對方一口拒絕，王於是拎番張申請表掉頭就走。但當佢行到一半時突然折返，懇求上司給予機會，對方聞言相當不悅，但終歸都畀佢嘅誠意打動，叫王遞張申請表畀佢簽名，簽完之後就將表格扔喺地上。

執起上司簽咗名嘅申請表，王桂壎話好記得當時激動到流出眼淚，並剛好滴喺眼鏡上，然後再滑落於申請表上司簽名嘅位置度，嚇到佢心裏大嗌，話個簽名千祈唔好化開呀！

獲得獎學金之後，王本應喺律政司工作至少五年，但佢未滿五年就離開咗，去咗一間英資律師行工作，雖然初期覺得唔慣，但經過一番拚搏，王終於成為呢間律師行嘅第一位非英籍合夥人。