政情：謝偉俊定銓立會立立亂

議員唔熟書成日嗌錯名

隨住泛民主派議員總辭，立法會只係得番43名議員，當中41人都係建制派議員添。即使今屆立法會任期已經過咗差唔多5年，又係得番「自己人」咁滯，議會上仍然出現嗌錯對方大名嘅情況喎。邊個咁唔好彩呀？咪就係建築、測量、都市規劃及園境界議員謝偉銓囉！

立法會尋日開會討論一個議員議案期間，多位議員發言前都多謝提出議案嘅謝偉銓，不過就連番甩轆喎，事關佢哋講錯成另一位議員謝偉俊嘅大名啊。首先係議員葉劉淑儀發言期間，唔小心講錯「我感謝謝偉俊議……謝偉銓議員提出嘅議案」，其後就到議員邵家輝「接力」，一度嗌錯人名話「啊謝偉俊……謝偉銓議員講話要……」。

緊接邵家輝發言嘅議員麥美娟就忍唔住「抽水」，一開波就話「首先呢我要多謝今日提出呢個議案嘅謝偉銓議員！」佢讀到「謝偉銓」三個字嗰陣仲專登放慢嚟讀，之後再笑住補多句「個個都嗌錯你個名！」

葉劉曾被嗌錯麥美娟

尋日大家就係將謝偉銓嗌錯成謝偉俊，咁會唔會有相反情況發生呢？原來真係有喎，翻查紀錄，發現喺今屆立法會任期初展開嗰陣，人稱「肥老闆」嘅議員張華峰喺2016年12月主持財經事務委員會時示意謝偉俊發言，點知就衝口而出嗌錯做謝偉銓。當時仲有立法會秘書即刻提水，點知肥老闆仍然「堅持」嗌錯，要立法會秘書再一次幫佢更正呀。而謝偉俊自己都忍唔住講咗句「係謝偉俊呀！主席」，之後肥老闆先改番口。

真係無獨有偶，肥老闆舊年主持財經事務委員會主席選舉時，就嗌錯葉劉淑儀做麥美娟，惹起建制派哄堂大笑。之前肥老闆仲試過唔記得麥美娟個名，用「個女仔」嚟形容佢添。睇嚟大家都榜上有名、感同身受！

雖則有關嘅兩位議員名字只係相差一隻字，又係戴眼鏡，都有唔少共通點。不過大家做咗同事咁多年，仲會叫錯對方嘅名。睇嚟鬧官員唔熟書之前，議員可能都要畀心機，記熟各位同事嘅大名喇！