昔日東方政情：傳國泰工會內訌 藍組莊黃阻撓
因管理不善而在全球最佳航空公司排名跌出三甲的國泰航空，近日內部流傳一則消息，指國泰空中服務員工會，其工會代表任期已經完結，有多名被視為「藍」嘅員工組成候選莊，引起其他「黃」嘅員工不滿，擔心候選莊上任後會解散工會，呼籲會員投反對票。睇嚟國泰唔單止搞唔掂業績，內部連工會事務都是非多多，唔怪得之愈做愈燶啦！
憂當選後解散工會
有員工話，自從上屆工會理事任期屆滿後，唔少同事擔心以工會代表向公司爭取福利，會被秋後算帳，導致無人願意組莊。之不過，近排有「一班藍絲毫無預兆咁殺出嚟」，遞交申請表，好多員工就喺社交媒體上議論紛紛，話擔心候選莊當選後會解散工會，以後唔會再有工會爭取福利咁話喎。
消息又講，部分「黃」嘅員工雖然唔想「藍絲」成功上任，但就擔心無人想做工會，有可能會投贊成票「袋住先」。另外有員工喺網上表明，有其他同事招募緊人手組莊，人數啱啱好足夠，但趕唔切喺申請期內遞交，呼籲所有會員投反對票，迫使公司重新開放申請。話時話，國泰成日被外界鬧向員工開刀，難怪無人敢上莊啦。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
