政情：立會月中改裝設施 前廳上層建會客室

立法會尋日向議員發出文件，話為咗加強支援議員工作，按立法會主席指示正研究提升會議廳前廳嘅設施，歡迎議員提出意見。文件指立法會期望大樓改善工程可於今年底前完成，率先展開嘅工程將會係本月中，為會議廳前廳上層範圍改裝為3間議員會客室、將教育活動室改裝為議員會客室同埋開放式工作間等。另外仲會喺會議廳同會議室增設座位，以容納更多議員出席會議。

會議廳前廳並唔開放畀傳媒使用，文件亦附有前廳嘅照片，可以見到內部空間寬敞，放有6張長形梳化。仲有電視、電腦工作站及自助咖啡吧等。