政情：港府授勳海關關長鄧以海榮獲銀紫荊星章警務處長蕭澤頤勇奪卓越獎章

政府公布今年授勳名單，多名紀律部隊高層獲行政長官頒授勳銜，其中海關關長鄧以海獲授銀紫荊星章，喺紀律部隊及廉政公署卓越獎章方面，新上任警務處處長蕭澤頤同消防處副處長楊恩健亦獲表揚。政府就話，今年獲授勳銜人士為香港作出重大貢獻，惠及社會各個領域，對此表示衷心感謝。

獲頒授銀紫荊星章嘅鄧以海加入政府服務長達36年，自2017年獲晉升後一直出任海關關長至今。政府讚揚鄧一直盡心竭力為政府同香港市民服務，表現傑出；並帶領香港海關護法守關、促進便商利貿、保障消費者權益，同時為公眾提供高效率、優質、專業同創新服務，貢獻甚豐。喺鄧嘅帶領下，海關肩負本港把關重任，成為堵截外來非法物品嘅第一道防線，做到精準、敏銳同及時。

黃國興楊恩健陳建強同獲表彰

「新一哥」蕭澤頤就獲政府頒授香港警察卓越獎章，以表揚蕭服務警隊超過32年，表現卓越、忠誠勤敏。佢近年出任副處長時不時親臨前線督師，例如參與本月「雷霆2021」同「犁庭掃穴」等行動；亦關心同袍工作情況，例如喺警隊參與疫情「封區」行動時，曾到場鼓勵同支持同袍，警務處副處長劉賜蕙亦獲頒同樣獎章。另外，政府又向警長孫偉薇、警員雷俊傑、警司黎遨遊同盧秉善頒授銀英勇勳章；以及向警司梁志恒、警長莊小龍、警員何思駿同吳凱健頒授銅英勇勳章，以上各人除盧秉善外，均於反修訂逃犯條例風波期間，執行職務時遭受攻擊而受傷。盧秉善則因奉召拆除兩枚炸彈，所表現嘅非凡勇氣而獲表揚。

懲教署副署長黃國興則獲頒香港懲教事務卓獎章。至於消防處副處長楊恩健及有「救護一姐」之稱嘅救護總長曾敏霞，分別服務消防處逾29年同逾32年，政府讚揚二人表現卓越、忠誠勤敏，分別向二人頒授香港消防事務卓越獎章。

另外，本身係牙醫嘅陳建強亦獲頒授銀紫荊星章，獲表彰多年來喺保安、廣播等領域嘅公共服務，建樹甚豐，勇於承擔。陳建強過去曾經被委任參與多個政府諮詢或法定組織，例如曾任香港電台顧問委員會主席等。