政情：港府行政未以人為本 議員促藉機改革

兩位議員尋日雖以主持人身份出席圓桌會議，不過都忍唔住評論幾句。張國鈞話好多時都喺立法會批評政府，覺得行政系統內未能做到以人為本，係最影響管治質素嘅問題。佢希望趁住香港呢幾年嘅關鍵時刻進行3方面改革，包括優化問責制、公務員制度以及地區行政制度。

有意見認為，政府問責官員係一份筍工，但陳恒鑌反而認為係冇階梯、冇培訓、冇前途！皆因完成5年任期後都唔知有冇得留低，況且缺乏旋轉門啊。

同場有學者同意兩位議員嘅見解，又指問責官員入到班子先至互相認識，又點會建立到一個好團隊呢？學者亦提及問責官員大多由公務員晉升，按章辦事嘅文化早已經不合時宜喇。譬如面對疫情，根本就冇得跟程序制訂應對方案。