政情：楊政龍與青年對話 助制訂職業路向

楊政龍話不斷積極安排唔同嘅機構探訪甚至實習機會，包括帶領青年學生參觀集團旗下唔同業務，亦會安排一啲年輕人較少機會接觸嘅行業，希望年輕人能擴闊眼界，了解唔同行業運作。佢亦向在場嘅青年學生提供旗下業務嘅暑期工或兼職實習機會，希望讓佢哋體驗職場實況同加深對職場文化嘅認識，協助佢哋訂立未來工作方向。而3位青年學生亦談及對居住喺「共•融舍」嘅感受及成效，又感謝英皇國際嘅善舉，令有需要嘅人士得到住屋支援，以解燃眉之急。

英皇國際同新家園協會合作推出「共•融舍」房屋共享計劃，為基層家庭提供過渡性居所，原計劃嘅租用期為一年，現則延長至18個月，直至2022年4月，進一步協助同配合住戶過渡艱難時期。

另外，佢嘅爸爸英皇集團主席、南九龍獅子會創會會長楊受成，尋日出席獅子會捐助、由聖雅各福群會舉辦嘅「後顧無憂」規劃服務殯葬援助基金啟動禮，資助有經濟困難、無依無靠嘅長者或者末期病患者，喺佢哋離世後為其支付基本嘅殮葬費用。楊受成話善終服務係最偉大嘅慈善事業，又話廣東人最鍾意鬧人小心收尾嗰幾年，其實人老咗如果無錢又無仔女照顧，都真係好慘，所以佢喺活動致詞時再話會喺本身基金93萬港元之外，再捐多20萬港元，叫基金會會長有咩需要再搵佢幫忙添啊！