政情：疑洗底避劫周庭突刪Fb專頁

月中剛出冊休養去染髮

多名參與前年民主派「35+」初選，而被控涉違反《港區國安法》嘅立法會前議員同前區議員，近半年紛紛關閉或移除Facebook（Fb）專頁，被外界質疑係為咗洗底保平安。呢股「風潮」更延伸至其他民主派人士身上，其中因前年包圍灣仔警察總部案，被判囚10個月嘅前香港眾志成員周庭，喺今個月12日刑滿出獄。雖然佢過去一直活躍喺唔同嘅社交平台，但其Fb專頁尋日就被發現已關閉，唔通佢都有相同諗法？之不過，佢前晚喺另一社交平台Instagram（Ig）轉發最新動態，仲見到佢已經換咗個新髮色添！

周庭喺出獄後隨即喺Ig發文，話「痛苦的半年零二十天，終於完結了」，又話「接下來就要好好休息，養好身體，因為身體在這段期間變得太瘦弱了」，之後就較少喺Ig同Fb貼文。之但係，佢嘅Fb專頁尋日就被發現已關閉，顯示為「無法瀏覽此頁面」，至於佢另一個私人帳戶則冇受影響。

於另一社交平台轉載髮型師動態

有別於喺Fb經常分享同時政有關內容，周庭大多數喺Ig上載外拍相片同分享個人感受，雖然佢已經有近兩個星期冇再更新Ig貼文，但佢前晚就有轉載髮型師嘅限時動態。上年6月先第一次染髮嘅周庭，今次就再挑戰較為新潮嘅造型，下半截頭髮已經染成淺粉紅色，仲話「我個頭終於返來了」，髮型師更叫佢整靚個頭先繼續好好休養添啊。都係嘅，周庭在囚逾半年，出番嚟都真係要打理一下。

雖然佢已就包圍警總案服刑，但上年8月就因為涉嫌違反港區國安法中嘅勾結外國或者境外勢力危害國家安全罪，被警方國安處拘捕，唔知關閉社交專頁又係咪一個可行方法保平安呢？