政情：議辦交吉怨民政處拖延回覆 劉珈汶徵大隻佬幫手

劉尋日喺社交網站發文，劈頭就話「我真係冇錢喇」，聲稱早喺辭職時同助理三番四次問民政處有關交還物資嘅事宜，每次得到嘅回覆都係「聽日覆你啦」、「盡快覆你」。卒之拖到連助理都搵到份新工，已經冇人幫佢手，但交吉辦事處已經迫在眉睫。唔想畀幾百蚊搬運費，劉就喺網上徵求大隻佬同司機大佬幫手喎。至於黃大仙民政事務處就話，區議員必須喺離任後一個月內，將實報實銷嘅開支償還額所購置嘅物資，交回屬區嘅區議會秘書處，並已致電劉商討交還物資嘅安排，雙方已意喺6月28日交收，又話對於拖延回覆嘅指控，表示極度遺憾。

由多名民主派區議員籌組嘅「香港公民議政平台」解散前，曾經畀政府質疑屬非法平台。劉珈汶因曾經借出辦事處畀平台成員開會被扣起部分開支，佢話有關金額起碼10萬港元。