政情：梁晃維還押待審 10歲貓尋新主人

話說舊年梁晃維喺華貴邨執咗一隻貓女，並起名為「貴貴」。當時呢隻貓幾陷於奄奄一息嘅狀態，體重只得一公斤左右，連眼都睜唔開，但大半年後體重已有3.4公斤，精神咗好多，又行得走得，依家食瞓屙都冇問題，平時仲會嗲人討摸摸添！之不過，約10歲高齡嘅貴貴雖然冇貓愛滋，但患有腎病，要隔日打皮下水；以及有糖尿，要每日早晚打胰島素，隔三個禮拜要打造血針，腸胃比較差要每日食益生菌，平時要食處方腎糧。雖然年紀大同多病，但貼文強調已經有人願意承包醫藥費，只係差一個屋企畀貴貴安享晚年啫。

貼文出咗幾日，暫時未知貴貴搵唔搵到新主人，但講到要為寵物貓搵「永遠嘅屋企」，可能梁都預計到失去自由嘅日子，並非短暫。