政情：憶十年共事 蕭偉強難忘張建宗「特異功能」

蕭偉強話張建宗異於常人嘅能力，係可以長時間坐喺立法會回應議員質詢，期間可以不進餐，甚至唔去廁所。蕭以通過最低工資、長者生活津貼呢兩個馬拉松會議為例，當時每日開會直落10幾20個鐘，列席會議嘅議員出出入入，主席副主席互相替補，但時任勞福局局長嘅張建宗卻唔進食、唔去廁所。結果有一次要勞煩當時嘅福利事務委會主席陳婉嫻暫停會議，等張有機會去廁所，以保障職安健喎。而蕭就指自己坐會最長嘅紀錄不過係9個鐘，已經搞到坐骨神經痛，直至依家都要每日游水治療呀！

至於張另一項「特異功能」，就係可以牢記人名同數字，只要係張認識過嘅人，即使對方係「無名小卒」佢都噏得出名字咁話。其實張昔日於港大攻讀歷史系，經常都要強記歷史人物同年份，因此練就牢記人名同數字嘅能力，都唔出奇。