昔日東方政情：禁電子煙委員會傾足15次仍陷膠着
因上年立法會會期結束而「胎死腹中」，涉及禁售電子煙及加熱煙嘅《2019年吸煙（公眾衞生）（修訂）條例草案》法案委員會，雖隨立法會延任而「復活」，但至今仍未完成審議。法案委員會尋日再召開會議，批發及零售界議員邵家輝提出修正案，但礙於時間關係，又要等下次先可以討論。
會議上，旅遊界議員姚思榮要求政府交代，點解加熱煙氣霧比傳統香煙含更多化學物質。衞生署控煙酒辦公室主任封螢醫生就解釋話，由於種植方法、添加劑、加熱溫度、生產工藝不一，釋出嘅物質都會有所不同。話口未完，邵家輝就質疑政府又再講啲唔講啲，指當中部分化學物質亦同樣出現喺食品或飲品內，政府唔應該混淆視聽，反而應該用數值去衡量嚴重程度囉。
邵家輝提修正案要等下次
本以為又會上演一場辯論啦，誰知直接進入逐條審議嘅階段，直到會議即將結束，邵先有機會提出，主張禁電子煙、規管加熱煙嘅修正案。之不過佢提出都冇用，事關都就快夠鐘完會喇！政府代表揚言對邵嘅修正案有保留，但都會返去研究吓喎。委員會主席黃定光就話，都要加會審議喇。其實法案委員會前後已經召開15次會議，唔知幾時先至有結果呢？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
