政情：政府工程標價極低 議員憂承建商將貨就價

議員劉國勳尋日話政府喺舊年第4季批出嘅基本合約中，平均中標價只係相當於預留款額嘅70%。佢擔憂承建商會選擇聘請非法勞工降低成本，提及舊年嘅地盤工程死亡人數有18人，但今年上半年已經有14人死亡，仲未包括非法勞工嘅數字添。議員梁志祥就關注工程成本會喺疫情好轉後上升，年期較長嘅工程難以承擔餘下費用，擔心承建商會蝕本執笠，迫使政府要向立法會申請追加撥款。

政府回應話會考慮承建商嘅技術能力同表現，有關評分比重一般佔40%，繼而先至考慮標價。如果有唔合理嘅低價標書，顧及到可能會引致毀約亦唔會被採納。另外，政府話過去10年只係得2.3%嘅工程經評估屬於合理嘅成本增加，先向立法會申請追加撥款。至於喺今屆政府所批嘅工程中，亦毋須申請追加撥款。