政情：議員炮轟部門乏溝通似飲茶搭枱

官員問責制卸膊詐詐諦

本港接連遭受社會事件同新冠疫情衝擊，然而主事官員顢頇無能，民怨鼎沸。喺尋日嘅立法會會議中，有議員枚舉政府採購口罩、實施隔離檢測反應慢、出現「鉛水樓」、沙中綫工程剪鋼筋等令人搖頭嘅事件，皆反映相關主事官員失職。亦有議員形容各部門嘅官員，就好似飲早茶搭枱嘅茶客一樣冇溝通。更有議員批評，已經實施19年嘅高官問責制係名存實亡、形同虛設，猶如「千錯萬錯都唔係官員錯」。

立法會通過「改革主要官員問責制」議員議案，議員鍾國斌指出政府嘅決策班子並非以政黨組成，所謂問責官員嚟自五湖四海，埋班之時先至首次見面、互換卡片。

指公務員呻對新上司如「湊仔」

鍾引述有高級公務員同佢講，面對新上司係「湊仔咁湊」！質疑來自政治任命嘅新局長係咪可以駕馭職位。曾屬首批問責官員嘅議員葉劉淑儀則坦言，難以理解政府物色官員人選嘅準則，例如前商務及經濟發展局局長蘇錦樑，全無商界同參選經驗，對於其任命真係摸不着頭腦，政績更係乏善可陳，形容佢處理電視發牌事件做到喊咁滯喎。

議員張華峰則批評，未見抗疫不力嘅官員落台，反而推諉於制度同程序問題，彷彿千錯萬錯都唔係官員錯。佢又舉例之前有反對派人士騎劫學校畢業禮，若非相關官員避事，教育發展豈會落得如斯田地？張認為問責制形同虛設，導致政府民望低，市民先會拒絕響應政府呼籲接種疫苗。

至於議員麥美娟提出修正案，建議將運輸及房屋局拆局。佢不滿本屆政府曾於2018年《施政報告》提及有關研究，但喺今年初又話唔打算作重組。麥形容係「抓」晒頭，反映官員好似飲早茶搭枱嘅茶客一樣欠缺溝通。

政府回應話，目前嘅政治委任制度切合特區管治需要，又指議會喺過去幾年泛政治化，令行政同立法機關難以配合，政府施政舉步艱難，令香港錯失唔少發展機遇。

不過《港區國安法》落實後，香港由亂及治，政府可以重新聚焦解決社會深層次問題，近日政府施政效能已有所提高咁話。