政情：吳秋北轟香港01反中亂港

毒媒逐個數貼圖諷堆填

繼壹傳媒黎智英涉違反《港區國安法》被捕後，警方國安處日前派出逾500名警員搜查壹傳媒大樓，並拘捕5名集團高層，其中壹傳媒行政總裁張劍虹同《蘋果日報》總編輯羅偉光，被落案起訴串謀勾結外國或者境外勢力危害國家安全罪，保安局更凍結蘋果3間公司嘅資產，《蘋果日報》因缺資金亦瀕臨執笠。工聯會會長吳秋北更點名直斥網媒《香港01》、《立場新聞》同電視台有線新聞，擔當反中亂港嘅平台或助攻，最終自取滅亡。

吳秋北尋日喺社交平台貼圖，批評香港有啲媒體擺唔正自身角色，老是主動擔當反中反共亂港嘅平台或助攻，咁做只會搞死香港，然後自己都「摺埋」或被撥亂反正被「摺埋」。佢話呢啲係自取滅亡嘅操作，例如《香港01》竟將國家惠港政策同舉措與《港區國安法》對立起來，呢啲報道帶有情緒，而講白啲，內心就係牴觸中央。

《立場新聞》都有份

狠斥《香港01》之後，佢將矛頭轉去《立場新聞》。佢批評《立場新聞》不斷炒作《蘋果日報》資金被凍結，所以《蘋果日報》員工出唔到糧，又向政府、警方潑污水，企圖引起輿論話政府、警方先至係員工權益受損嘅禍首，從而轉移壹傳媒同黎智英等為害國家安全，先係戕害員工真兇嘅事實。

唔單止網媒，電視台亦被點名批評。佢跟住又舉有線新聞為例，話有線新聞報道今年7‧1唔搞反中亂港遊行，「那如喪考妣的口脗，充分展示反對7‧1回歸的真情」。

佢貼文批評呢3間媒體之外，仲附圖寓意《蘋果日報》、《香港01》、《立場新聞》、有線新聞同《100毛》被棄置堆填區，又話呢啲媒體反中亂港嘅居心，點會唔自取滅亡。