昔日東方政情：「老鴿」出山 當選副主席 李永達：黨內區議員憂心被DQ
因參與舊年民主派「35+」初選，涉違反《港區國安法》現正還押嘅前議員、同屬民主黨嘅林卓廷、胡志偉同尹兆堅等3人先後辭去黨內副主席同埋中委職務。民主黨尋日舉行特別會員大會，補選黨內副主席同埋兩名中央委員會成員空缺。黨內「老鴿」、曾任主席同副主席嘅李永達（高達）喺無競爭嘅情況下當選副主席，佢仲透露黨內區議員曾反映擔心被撤銷資格（DQ）。
上任首要穩住「軍心」
至於中委會候選人梁國華同張茂清亦都成功當選。對於高達再出嚟擔任副主席，佢早前強調原本無意再出任該黨嘅管理層，只係探望在囚黨友時，被林卓廷同前主席胡志偉及前副主席尹兆堅「力勸出山」。
高達當選後又話知道現時擔任政黨領導層有一定風險，但相信自己有承擔黨內工作嘅責任，會堅持喺合法範圍內表達市民心聲。佢又指，過去幾日同30至40名黨員或區議員會面，了解到佢哋擔心被捕或遭DQ，所以佢上任後首要工作係加強同黨員溝通，穩住「軍心」，呼籲佢哋唔好過分驚恐或者作出太激烈嘅反應喎。
查實高達本身亦有案底在身。2014年爆發違法佔領行動（佔中），高達喺2019年被裁定煽惑他人作出公眾妨擾罪成，被判入獄8個月，緩刑兩年。高達獲得輕判，當時曾惹起輿論熱議。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
