政情：議員憂運動員宣揚政治理念政府：或招致停賽

政府早前出資購入日本東京奧運轉播權，交由電視台作直播或轉播。有議員尋日喺立法會民政事務委員會會議上，話擔心有運動員利用國際轉播嘅機會宣揚政治理念，或者做出反政府嘅行為。民政事務局局長徐英偉就回應話，政治同運動要分開，唔應該混為一談；體育專員楊德強強調，運動員唔應該將政治帶入運動場，若違反指引可能會招致停賽處分。

港女子花劍隊曾做反政府手勢

議員何君堯喺會議上建議，運動員出發前應簽署承諾書，政府亦應該加以提點，避免運動員喺比賽期間作出反政府行為。委員會主席梁志祥亦有此顧慮，舉例話香港女子花劍隊3人喺2019年出戰世界盃時，曾經喺影相期間做出「反政府」、宣揚政治嘅手勢，希望政府跟進；議員容海恩就關注相關運動員有冇被處分。

徐英偉回應話大部分運動員都好專業，而政治同運動要分開，唔應該混為一談。楊德強就話，東奧運動員出發前要簽署文件指引，當中列明「政治同體育應該要分開」，亦唔應該喺運動場表達政治訴求，違反指引可能招致停賽等處分。對於香港女子花劍隊嘅處罰，楊話現時冇資料，徐就補充話3人已經唔喺比賽名單喇。