政情：面對輿論處之泰然 林超英：勿將麻煩變煩惱

林早前出席一個訪談節目，當中佢講到06年颱風派比安襲港但佢冇掛8號風球，以致飽受網民嘅撻伐，且有輿論要求佢下台添。雖然好多人遇上咁嘅情況都會煩惱得輾轉難眠，不過林話回想當日，其實都唔好意思向其他人講，自己仍然瞓得着喎。

林超英憶述當時自己不過係跟規矩、跟數據、跟科學原則下決定，人哋唔鍾意係人哋嘅事，認為天文台就算換咗另一個人做台長，都依然唔會掛8號風球，於是佢就諗通咗，其實外界只係狠批台長呢個崗位，而非鬧爆佢個人，佢只係咁啱當時正值扮演台長呢個角色咁話。

林又話，做人其實會不斷遇到麻煩，只要唔好將麻煩變成煩惱，而麻煩係冇所謂，因為麻煩係等待解決，今日解決唔到咪留待明天囉，若果永遠都不能解決咁就唔關你事啦。佢又指公務員流行一句笑話：一件事情擺在你手上，你能夠解決就唔係麻煩，若無法解決就交畀上司，咁就輪到係佢嘅麻煩喇！