政情：數碼港擴建撥款通過 被轟淪地產項目

建築、測量、都市規劃及園境界議員謝偉銓就話，當局最初遞交予財委會嘅文件內容太簡單，就擬建嘅辦公室大樓只係提供一張圖，幸好政府同數碼港前晚（10日）提供更多概念圖，否則作為議員都唔知點樣去審議。創新及科技局局長薛永恒發言時提到，好多初創企業一直希望進駐數碼港，但因空間所限而未能成事，又強調擴建後收益可達32億港元。

之不過，旅遊界議員姚思榮就反駁，舉例指地產項目亦可為香港帶來收益，批評當局說詞過分籠統，強調「呢個係50億嘅錢，唔係50萬嘅錢」。另一議員葉劉淑儀亦批評，當局視擴建計劃恍如地產項目，只交代租得好、唔夠用，批評當局並無就創科事宜提供更多資料。