政情:老鴿李永達謀出山 借黨友過橋
林卓廷還押 副主席位懸空
涉去年民主派「35+」初選案、正被還押嘅前議員林卓廷,上月初辭任民主黨(白鴿黨)副主席後,有關職位至今一直懸空。據了解,白鴿黨最快喺本月下旬召開中央委員會,料屆時會舉行副主席選舉。不過,截至目前為止,只有黨內元老、曾任主席同副主席嘅李永達(高達)公開表明出選。俗語有謂「姣婆守唔到寡」,莫非高達呢隻「老鴿」被雪藏得太耐,依家不甘蟄伏,所以要走出嚟同一班「乳鴿」爭食?
高達尋日強調,自己原本無意再出任該黨嘅管理層,但又同時講到自己過去兩個月探望在囚黨友時,正正被林卓廷、前主席胡志偉以及前副主席尹兆堅「力勸出山」,所以先至決定出選以「穩定軍心」喎。聽起上嚟真係委屈咗你喇!
睇番白鴿黨上年換屆時,高達未有競逐連任中委,但相隔唔夠一年就再度披褂,意圖角逐副主席。唔知當時係咪嫌棄中委嘅級數太低,先至唔想繼續「降格」做落去?
佔中案獲輕判緩刑 曾惹熱議
之不過,當時白鴿黨係銳意要將領導層年輕化,唔單止新主席係歷來最年輕,而且中委平均年紀亦低過40歲,只有胡志偉同尹兆堅兩隻係「老鴿」。莫非一班「乳鴿」係嫌1955年出世、年逾花甲、合資格拎長者卡、可以用兩蚊搭車嘅高達太過年邁,當時先至決定踢佢出局?
話時話,雖然有該黨中人認同高達目前並無官司困擾,都係適合接任副主席嘅人選,但查實高達本身亦有案底在身。
2014年,本港爆發違法佔領行動(佔中),高達作為「佔中九子」嘅其中一員,喺2019年被裁定煽惑他人作出公眾妨擾罪成,法官話考慮到佢過去曾服務社會,所以判處入獄8個月,緩刑兩年。高達獲得輕判,當時曾惹起輿論熱議,但無論如何,正因為毋須承受牢獄之災,高達今日先至有機會再度問鼎白鴿黨副主席嘅職位。
另一方面,雖然目前未有其他人表明有意出選,但高達想要成為副主席,按規例仍然要過黨友投下信任票呢一關。唔知最近頻頻曝光嘅高達,到咗投票日會唔會被「乳鴿」跣佢一鑊,最終無法得償所願做副主席呢?
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500