政情：年前發現腎腫瘤 畢東尼為見家人滯英

兩個月前畢東尼宣布退出政壇，尋日佢再解釋箇中原因。原來畢東尼喺一年前突然覺得心臟疼痛，醫生檢查後認為心臟並冇問題，不過就發現腎臟有個一厘米嘅腫瘤。佢原本安排今年2月進行手術，但考慮到所冒嘅風險，所以先到英國同屋企人會面，殊不知就此滯留英國。畢東尼話長達42日嘅酒店隔離中，明白到「斷捨離」嘅道理，對於某啲事情必須有所放棄。

原本安排好嘅手術結果延至上月先至進行，畢東尼話住院時有一晚覺得痛不欲生，曾渴求離開人世。佢話現時仍感到痛楚，希望下星期移除體內喉管後，可消除不適感覺。除咗疾病為佢帶嚟考驗，仲有精神上嘅痛苦，因為摯愛嘅親人唔喺身邊，令佢孤獨咁面對苦難。