政情：部門卸責珍貴印度廟保育乏規劃

隨住新界步向城市化，隱沒於叢林嘅歷史建築亦浮現於公眾嘅視線。粉嶺皇后山有一幢列為三級歷史建築、荒棄多時嘅印度教神廟，由於其特色建築，十分罕見，引來公眾紛紛到來「打卡」，北區區議會尋日討論印度廟嘅保育工作，結果有區議員不滿出席嘅房屋署代表「耍太極」，鬧爆政府部門各自為政。

區會促重新評級動議獲通過

北區區議會主席羅庭德指，現時發展局轄下嘅文物保育專員辦事處，自2010年後並無任何與皇后山印度廟相關嘅保育工作計劃，因應今年9月居屋山麗苑入伙以及廟宇嘅結構狀況，認為廟宇有急切嘅保育需要。但鑑於印度廟位於山麗苑旁邊且欠缺通道，於是羅要求房屋署就制訂屋苑銷售公契時，為印度廟預留出入通道，惟房屋署代表指印度廟屬屋苑發展範圍外，應由地政總署負責，又話當局2015年收地時，冇人要求設置通道前往印度廟。

不過羅就話印度廟同屋苑邊界相差只有約一米，質疑進行屋苑工程時無可能留意唔到印度廟。羅又指新界北仍然有唔少工程發展，若各個政府部門仍然各自為政，實在有損政府公信力。至於要求古物諮詢委員會為皇后山印度廟重新評級嘅動議，就獲得在席15名區議員全數通過。