昔日東方政情：盧維思死撐迪士尼 倡海洋公園搬到隔籬
長期虧蝕嘅香港迪士尼樂園，上年度受疫情衝擊，淨虧損竟高達26.6億港元。至於迪士尼10年嚟都未有善用佔地多達60公頃的竹篙灣迪士尼第二期用地，以致政府去年決定收回土地。當年有份同迪士尼談判落戶計劃嘅投資推廣署前署長盧維思仍然「死撐」，希望政府將迪士尼發展成豪華旅遊熱點，甚至將海洋公園遷至迪士尼側邊。
有「米奇老鼠」花名嘅盧維思尋日出席網上節目時，同意香港迪士尼嘅營運冇想像中咁成功，例如一開始已經犯咗幾個營運同營銷錯誤，不過好快就重回正軌。盧維思仲好捧場，話自己一直有買樂園年票，70歲大壽時仲喺樂園舉辦派對添。
可騰出黃竹坑地段建屋
當被問到支唔支持政府利用竹篙灣迪士尼第二期用地建屋，盧維思話始終認為樂園對香港而言係重要嘅資產，仲落力推銷港府應該將迪士尼打造成一個豪華旅遊熱點，建議將海洋公園搬去迪士尼隔籬。政府就可以喺海洋公園嘅黃竹坑地段起樓，仲話相信可以起3至4個太古城添！之不過海洋公園嘅業績都危危乎，要由政府泵水吊命，若果搬遷咪又再倒錢落海？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
