昔日東方政情：唔識英文都做議員？ 葉劉：至少大學畢業啦
政府經常被狠批施政不力，但部分議員亦都唔好得幾多，其議政能力不時遭到公眾質疑，就連常識方面都惹人詬病。議員葉劉淑儀就話因應時勢，認為議員至少都應該具有大學學歷喎。之不過數一數現屆立法會，未讀過大學嘅議員大不乏人，正所謂「言者無心、聽者有意」，呢個主張驚唔驚得罪人呢？
目前立會候選人無學歷要求
葉劉日前喺電台節目發表意見，話希望下屆議員能具備一定知識水平、理性分析不同議案，況且香港作為國際都會，立法會亦有議會聯絡小組委員會，議員有責任加強對外宣傳，化解外國對香港嘅誤會。所以佢認為參選嘅議員應該「起碼讀過大學、起碼要識英文啦」。除咗學歷，葉劉又提到以往有部分議員唔到晏晝3點鐘都唔露面、唔發言、唔提問，亦冇提出辯論議題。佢坦言擔任議員最基本係要付出時間、精力同心力。
但現實上，成為立法會候選人只係設有年齡及國籍等基本要求，並無設有學歷要求。亦都有幾位現屆議員並冇大學學歷，仲由頭到尾都講到明唔會接受英文訪問，唔知呢幾位同事又會唔會介意葉劉呢番言論呢？
本文連結 : https://orientaldaily.on.cc/content/要聞港聞/odn-20210530-0530_00176_404/政情：唔識英文都做議員？--葉劉：至少大學畢業啦
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
