政情：申注資獎券基金無睇餸食飯港府捱轟

受疫情拖累，獎券基金有關六合彩獎券嘅收入亦大幅下跌。為提供更多福利服務，政府申請11億港元追加撥款以向基金注資，但有議員不滿政府未有「睇餸食飯」，建議增加六合彩攪珠次數以穩定收入。另外有議員不滿政府去年利用基金興建隔離設施，其11億嘅耗資咁啱同今次撥款條數一樣，質疑今次嘅申請其實係用嚟填數。

尋日立法會財務委員會甫開始，就繼續討論獎券基金追加嘅撥款項目。其實該項目喺上周討論時，就已經出現爭議。勞工及福利局雖應議員要求，提交補充文件再作討論，但議員謝偉銓就抱怨話，尋日開會前兩個鐘先至收到文件，斥政府以為福利項目屬於道德高地，立法會就一定批准。而議員葉劉淑儀就埋怨局方並冇搵佢哋認真商談，只係勞福局政治助理同佢拍吓膊頭就算。

議員田北辰批評政府利用基金興建隔離設施，質疑檢疫同福利係兩回事，又翻舊帳話政府當時聲稱唔會影響福利服務，之不過今次再到立法會申請追加撥款就有「填數」之嫌。佢認為若然無法控制收入，就應該「睇餸食飯」。勞福局副局長何啟明就企硬話「兩個11億冇親戚關係，係兩碼子嘅事」，又話相信市民對社福需求未必會想「睇餸食飯」。而興建隔離設施屬於保障市民，亦都係有利社會福祉喎！

議員建議基金改名

議員陸頌雄就話，若果喺街頭訪問市民咩係獎券基金，相信10個有9個都話輸錢畀六合彩就等如貢獻基金，而唔知政府亦有承擔角色，又建議基金重新命名。當何啟明話建議可考慮，同場嘅社會福利署副署長郭志良即刻搶答，話自60年代起已經沿用名稱，應該唔會改名。陸頌雄直斥郭態度傲慢，唔明點解當場拒絕建議，仲直言「其實仲想唔想我支持（口架）？」何啟明無奈再度解畫，澄清呢刻唔會改名，但會再研究意見。

項目僅勉強獲通過

大家拗咗一大輪，去到等待點票結果時，會議室外嘅政助同新聞秘書都屏息以待咁望實個直播屏幕，而會議室內嘅何啟明就猶如熱鍋上的螞蟻，當目睹以13票贊成、12票反對同2票棄權下勉強通過項目，先至放下心頭大石，向議員露出笑容。一眾議員步出會議室時，都紛紛向局方代表講「你哋好彩」咁話！