政情：陳肇始開會瞌眼瞓 唔通中咗招？

話說尋日醫管局研討大會邀請咗中國工程院院士鍾南山、政府專家顧問袁國勇、許樹昌等人分享內地同香港嘅抗疫經驗。點知陳肇始就唔係好專心，喺袁同許分享時不停瞌眼瞓，只有專家完成分享時先會醒吓，呢個情況更持續近半個鐘。難得一班專家在場，佢都可以喺眾目睽睽下「釣魚」，難道佢唔覺得肉酸咩？

之但係，陳肇始喺公開場合瞓着都唔係新鮮事。財政司司長陳茂波2月時喺立法會發表新一份財政預算案時，陳肇始捱咗一個鐘左右，就開始進入「瞌吓醒吓」嘅狀態，佢同幾位局長更畀傳媒捕捉到「釣魚」嘅鏡頭。

陳肇始唔單止成日瞌眼瞓，過去亦發生唔少瘀事。就好似今年初油尖旺一帶淪為「疫區」，佢要落區視察，當佢準備進入「受限區域」時，就即刻畀駐守嘅警長截停。原來佢落區時冇帶到證件，最後仲要在場嘅民政事務局局長徐英偉幫口解圍先獲放行。佢又曾經喺記者會上被發現翻轉口罩佩戴，到記者會結束時被追問都唔肯回應，認真尷尬。

其實作為問責官員最忌喺公開場合做出失禮行為，特別係自疫情爆發以嚟，陳肇始一直遭受猛烈抨擊，更多次被要求問責下台，理應珍惜每個機會吸取專家經驗同聆聽議員意見，反思過去工作成效。以佢近排嘅表現嚟睇，成日懵吓懵吓咁，又烏眉瞌睡咁款，相信好多市民都想問佢幾時瞓醒啊！

<!--AD--><div class="footerAds clear">第一手消息請下載on.cc東網<a href="http://itunes.apple.com/hk/app/id349812998?mt=8" target="_top">iPhone/</a><a href="http://itunes.apple.com/hk/app/id387862928?mt=8" target="_top">iPad/</a><a href="http://market.android.com/details?id=com.news.on" target="_top">Android/</a><a href="http://www.windowsphone.com/zh-hk/apps/30964640-6d0a-450c-b893-1e4aa6dde45f" target="_top">Windows Phone Apps</a></div><!--/AD-->