昔日東方金猴奮起千鈞棒 牛鬼蛇神必被捉
古人話，「犯強漢者，雖遠必誅」，功夫茶話，「犯東方者，雖難必誅」。大家唔好以為講笑吖，邪不能勝正，東方報業集團懸賞厚酬，不計代價追緝喺網上發放誹謗貼文嘅幕後黑手，捷報頻傳，依家又有辦你睇喇！
呢嗱，東方早前入稟高院控告「獨立媒體」網站兩篇分別登於○七及○九年嘅文章誹謗，要求禁制被告繼續發布涉案文章，並要求被告賠償及提供撰寫涉案文章嘅網民個人資料。原訟庭尋日裁定東方勝訴，被告「獨立媒體」除咗要向東方賠償十萬元及支付東方訟費，仲要提供兩篇文章發布人嘅個人資料，包括姓名、住址及電郵地址。
法官直斥兩篇涉案文章誣衊東方，內容屬誹謗，仲指被告呈交抗辯書後就冇再作任何跟進，連法庭命令都唔遵守，手法應被譴責。嗱，呢啲就叫做公道自在人心喇，正義再次得到伸張，大快人心！
其實，今次唔係第一次嘅喇，東方之前已經成功揪出多名發放誹謗貼文嘅高登「網民」，佢哋分別向東方作出賠償及刊登道歉啟事。事實一再證明，多行不義必自斃，網民發放誹謗文章，就算走到天涯海角，都必定會受到正義懲罰，為自己嘅無恥行為付出沉重代價。
正如法律界人士黃國桐話齋，今次判決可以清楚話畀網民同網站管理人知，唔好以為喺網上就可以亂講嘢，諗住「睇我唔到」、「搵我唔到」，講完乜事都無，其實一定捉到你！教育界人士梁秉雄亦指出，網民喺網上嘅任何舉動都被記錄，而電訊管理局要求網絡供應商儲存用戶紀錄長達三個月，一查即現形。
冇錯嘞，若要人不知，除非己莫為，誹謗者及幕後黑手知法犯法，惡意中傷，損害他人聲譽，以為神不知鬼不覺，可以逍遙法外，其實喺東方太陽照射底下，所有牛鬼蛇神都無所遁形。
話時話，惡意中傷東方及其管理層嘅貼文多年來喺網上陰魂不散，好明顯係有幕後黑手興風作浪。而最奇怪嘅係，流傳全球網站嘅八百幾篇誹謗貼文，中國居然佔咗七百幾篇，唔少仲係官方網站，簡直匪夷所思。唔怪得人哋話，今時今日，反中亂港先至有運行，真係冇講錯。
不過咁，功夫茶始終相信，天網恢恢，疏而不漏，呢個世界因果循環，報應不爽㗎。正如魯迅所講，「倘是咬人之狗，我覺得都在可打之列，無論牠在岸上或在水中。」東方報業集團為追求公義，唔理幕後黑手幾陰毒，唔理誹謗者幾狡猾，亦唔理花費幾多人力物力財力，誓要追緝到底，將牛鬼蛇神統統揪出來。掃除一切害人蟲，全無敵！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
