有性趣：網紅食意粉 好過賣肉？

呢位來自澳洲嘅26歲成人女網紅Grace Wears Lace，憑住喺OnlyFans等會員制平台發布裸照及成人影片，每個月可以賺取5位數嘅收入，至今已賺到過百萬澳元，仲經常坐噴射機到世界各地旅遊添！後來因為經濟不景，阿妹嘅收入大不如前，幸好早前佢搵到一條新財路，就係食意粉，唔係食一碟，而係食一大盤呀！Grace Wears Lace稱最近愈嚟愈多會員畀大筆金錢睇佢食意粉，食得愈多打賞愈多，收入甚至比製作成人影片多咁話。事實上，呢種所謂「餵食主義」（Feederism）並非最近至喺網絡出現，打賞者鍾意睇被餵食者嘅進食過程及飽肚反應，而Grace Wears Lace坦言並唔抗拒呢種搵食方法，因為佢本身勁鍾意食嘢，而且每日做運動鍛煉，所以唔擔心會影響健康喎！