有性趣：日本情趣娃娃廠結業

曾幾何時日本情趣娃娃憑仿真度高而享譽全球，其中就有喺1977年創業，總部位於東京嘅Orient Industry。原本喺上野及淺草經營情趣用品店嘅創辦人兼社長土屋日出夫，見當時日本情趣娃娃嘅質素低劣，又因有醫生朋友同佢講，殘疾人士因經常遭妓女拒絕，難以解決生理需要，便決定製造高品質情趣娃娃，更為殘疾人士提供9折優惠。不過該公司早前於官網宣布，80歲社長土屋日出夫因健康問題，將會喺9月20日結束營業。消息一出，有唔少人都感到唏噓，但有另一消息卻透露結業主因，在於內地製造嘅AI情趣娃娃質素愈嚟愈高，更具有互動功能，令競爭變得更為激烈，先導致呢間老牌廠執笠。