有性趣：脫星返賽場狂砌

來自澳洲昆士蘭嘅29歲脫星Renee Gracie，近年積極發展成人網紅事業嘅佢，早前不但喺社交帳號高調宣布買咗一架價值17萬美元嘅限量版SUV，又狂晒於較早前購買一架價值超過23萬美元嘅超跑，仲用嚟參加GT世界挑戰賽歐洲賽英國站添！而佢嘅炫富行為，網民非但冇畀負評，反而覺得佢係苦盡甘來。原來早喺13歲就開始參加小型賽車嘅Renee Gracie，憑住出色嘅成績，一直升呢成為超級跑車賽女車手。不過佢雖然名成，但並唔利就，陷入經濟困局嘅佢，喺2017年毅然放棄賽車事業，轉型成為裸模，及後更投身脫界。縱然挾住賽車手身份轉型成人業，收入幾何級提升，Renee Gracie卻坦言最初幾年仍要不斷還債，幸好隨住人氣提升，不但還清晒債務，近年更重新開展賽車事業，難怪網民話可喜可賀。