有性趣：情迷肌肉女

女人鍾情大隻佬，大多數心態都係貪佢哋有安全感，至於男士對肌肉女情有獨鍾，大家又點睇呢？不過有位男網民就慨嘆難結識到呢類型嘅女性。

早前網絡社區Reddit有位匿名男網民發文表示，佢係一個唔鍾意運動嘅普通男人，卻對肌肉發達嘅女性十分迷戀，自稱有肌肉癖嘅佢，每次見到肌肉女時，雖然好想跟對方搭訕，但總因對方身邊有位肌肉男而膽怯，想問有冇其他男士都愛肌肉女，有冇辦法令自己勇於求愛呢？貼文一出，引嚟幾百人討論，證明並非只有佢一個對肌肉女感興趣。網民表示喺健身室有唔少單身肌肉女，目標喺晒度，有網民坦言自己身形瘦削，卻喺健身室識到現時嘅肌肉女友，亦有女網民鼓勵佢，其實肌肉女唔一定鍾意肌肉男，仲話鍾意矮胖男添！不過有網民卻潑冷水，如果根本唔鍾意運動，睇佢都唔會踏足健身室，想識肌肉女難過登天！