有性趣：唔係啩！出軌令婚姻更幸福？

呢項針對1,400名承認曾經出軌嘅男女，所進行嘅問卷調查發現，當中有72%受訪者表示，自從佢哋開始出軌後，同另一半嘅關係有顯著改善。另外，有52%受訪者指自從佢哋背住另一半出軌後，性生活變得更美滿，由每個月曳曳一至兩次，變成每個月曳曳6次或以上，足足比未偷食前多咗3倍！雖然佢哋同另一半交多咗「功課」，但唔代表佢哋冇精力招呼出軌對象，因與此同時，佢哋同出軌對象嘅偷食次數亦會增加，由6至12次不等，難道真係唔滾唔知身體好？睇番呢個調查，原來係英國偷情網站Illicit Encounters所進行，因此有人懷疑呢個調查結果，有利佢哋宣傳偷情平台。不過關於呢啲懷疑，團隊未作出任何回應，只稱有72%受訪者認同自從出軌後，同另一半關係變得更好，僅有2%變得冷淡喎！呢個調查報告，大家覺得可唔可信呢？