有性趣：生前不行 身後雄起？

死後勃起俗稱「Angel Lust」，企喺度死嘅男人經常出現呢個現象，其中一個解釋係當血液聚積喺下半身就會產生壓力，一旦兵器充滿血液，就會發生膨脹勃起嘅情況。查實唔少男士都對胯下兵器有啲迷思，所以英國醫學會喺早前發表文章，澄清一啲常見嘅誤會。文中又表示，兵器硬直嘅情況，亦會發生喺剛出生嘅嬰兒身上，有時替孕婦進行超聲波掃描，都會見到胎兒有呢個生理現象。

順帶一提，關於「晨勃」，原來唔係朝早先會發生，一個生殖系統正常嘅男性，每晚瞓覺時都會勃起3至5次，每次硬直狀態約維持30分鐘左右，而據初步研究發現，可能同發夢時間有相關性。最後，文章仲補充一點，有關勃起功能障礙係好常見，所以有呢方面問題嘅男士唔使太自卑。