有性趣：貓奴易出軌？

呢項由英國婚外情約會網站llicitEncounters所進行嘅調查，搵嚟2千名有養寵物並活躍嘅會員參與，結果發現呢班偷食男女中，貓奴佔29%成為出軌之冠。據貓奴Sarah解釋，自己背夫出軌嘅原因，在於佢性格好似貓一樣，想成為關注嘅焦點，但係丈夫只顧住工作，故此要搵男人嚟填補空虛。兩性關係專家Jessica Leoni就認為，寵物嘅行為唔多唔少可以反映出主人嘅性格，而貓奴同貓一樣予人冷漠、高傲及缺乏忠誠度。至於第二位係佔21%嘅魚主人，之後順序排名分別係佔16%嘅兔主人，佔11%嘅鳥主人以及佔9%嘅狗主人。咁按專家嘅睇法，養魚、養兔仔嘅男女，佢哋偷食嘅原因係乜呢？唔好意思，專家冇作出任何解釋囉！