有性趣：咁都得？出軌測試員

「出軌測試員」會唔會成為新興職業？事緣英國一個社交平台最近掀起測試男友會否出軌嘅熱潮，性感迷人嘅女郎會幫女網民「勾引」對方嘅男友，從而測試對方嘅忠誠度，亦因此有位女網紅稱會考慮作出收費。

女粉絲求助

19歲嘅英國網紅Livi Shelby人靚身材正，佢表示經常收到女粉絲嘅求助，想知道男友係咪想出軌，而佢就會透過通訊應用程式約會男方，如果對方稱已有女友並拒絕嘅話，便證明對方並無出軌意圖。雖然做法好似好簡單，但Livi稱要突破女粉絲男友嘅防線，需要花唔少時間研究對方有乜嘢興趣、對愛情嘅睇法等。佢坦承呢種做法有啲狡猾，但卻堅稱係想女粉絲明白自己，其實可以搵個更好嘅另一半。由於搵佢幫助嘅人相當多，而且又要花時間，佢笑稱會考慮每單收1英鎊費用，仲話都已經夠佢發達喎！