有性趣：參杞酒 改善腎虛

參杞酒可以自行浸製，當中嘅「參」係指人參，「杞」就係枸杞子汁，前者要20克，後者要100毫升，其他材料包括白茯苓30克、杏仁30克、生地黃汁100毫升、麥冬汁60毫升，同埋白酒1,500毫升。

將人參、白茯苓同杏仁搗碎，連同枸杞子汁、生地黃汁同麥冬汁一齊放入容器，跟住倒入白酒並密封。浸泡約7日，之後就可以去渣飲用。

人參有大補元氣嘅功效，枸杞子可以滋補肝腎、益精明目，生地黃則能滋陰養血，配合埋其他材料，令呢味參杞酒具有滋腎陰、益精血等效用，適用於改善腎虛精虧、陽痿不起、面色無華等問題。