昔日東方有性趣：燉羊肉 補腎又明目
講起補身，好多人都會諗起羊肉，問題係大熱天時，食羊肉好似唔啱時候喎？其實又未必嘅，事關家陣天氣咁熱，唔少人都會喺屋企開大個冷氣，吹得耐好易搞到身體虛寒，呢個時候食羊肉補一補，就唔會咁易搞到有「冷氣病」啦！至於點樣利用羊肉煮番一味增強雄風嘅佳餚？不妨試吓枸杞燉羊肉。
要咩材料？
話明係枸杞燉羊肉，當然要先預備枸杞子同羊肉，前者分量為50克，後者可選羊腿肉，大約1斤，其他材料包括清湯2公升、葱段10克、薑片5克。
點樣做法？
步驟1：先將枸杞子用清水洗淨備用。
步驟2：羊腿肉放入滾水煮透，再放入凍水中洗淨一次，然後切件。
步驟3：將鍋燒熱再放入羊肉同薑片略炒。
步驟4：已炒好嘅羊肉連薑片放入砂鍋，再放枸杞子、清湯，然後開火煲滾。
步驟5：撇去浮沫後轉用細火燉煮約1至1.5小時即可。
步驟6：食用時，可加入適量食鹽調味。
有乜功效？
含豐富蛋白質嘅羊肉，喺中醫學角度有補虛勞、祛寒冷、益腎氣、助元陽、益精血等功效，加枸杞子嚟燉，可益精明目、補腎強筋，適用於改善陽痿、早洩等問題。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
