昔日東方有性趣：核桃仁炒韭菜 溫固腎氣
男士們想增強雄風，好多時都係透過食療嚟達到目的，但一般食療嘅烹調方法唔係蒸就係燉，食落確係唔夠香口惹味。以下為大家介紹嘅家常小菜——核桃仁炒韭菜，唔止有鑊氣又香口，仲可以補腎、壯陽，不妨得閒炒番一碟嚟送飯。
要咩材料？
話明係核桃仁炒韭菜，開鑊炒之前，當然要預備核桃仁同韭菜，分別需要60克同250克，仲要有麻油30克同適量食鹽。
點樣做法？
步驟1：先將核桃仁用滾水焯兩分鐘，瀝乾水後備用。
步驟2：韭菜切成約3厘米長，待用。
步驟3：將鑊燒熱後倒入麻油，等油燒熱就可以落核桃仁，炒至金黃色。
步驟4：之後可以放入韭菜一齊炒，炒到韭菜半熟就可以起鑊。起鑊之前記得落少少食鹽再炒勻就食得。
有乜功效？
核桃仁味甘性溫，有溫補肺腎嘅功效，而韭菜又叫壯陽草，可用於治療陽虛腎冷、陽道不振，換句話講，呢道小菜具有補腎壯陽、溫固腎氣等作用，有助改善腎陽不足所引致嘅陽痿、乏力、腰膝痠痛，亦可用嚟對付因腎氣不固而誘發嘅遺精、尿頻、便秘等問題。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
