有性趣：四色粥補肝腎緩衰老

「四色粥」之所以得名，因為裏面包含4種材料，包括綠豆、紅豆、黑芝麻、麥皮，所以呢款粥呈現綠、紅、黑、白共4種顏色，風味特別。材料分量方面，綠豆、紅豆各需100克，黑芝麻75克，麥皮則需為150克。

先用清水將綠豆、紅豆同黑芝麻洗乾淨，之後連同麥皮放入鍋內，加適量清水就可煲成粥。食用之前，可以酌量加入冰糖嚟調味，咁就更易入口。

四色粥嘅每款材料都好有益，特別係黑芝麻，具有補肝腎、益精血等作用，亦含有豐富嘅鈣質、鐵質、維他命A同E，後者有抗氧化功效，仲能夠促進性激素分泌，令男子精子活力和數量增加，可以話係男士補身佳品。至於麥皮可以補虛勞、壯血脈，紅豆能理氣活血，綠豆則可清熱解毒，減輕紅豆同黑芝麻嘅燥熱。