昔日東方有性趣：鹿肉首烏湯溫腎益精血
廣東人好鍾意煲湯飲，通常都會因應時節或者身體狀況嚟選擇湯水款式，舉例濕氣重會煲粉葛赤小豆或土茯苓瘦肉湯。如果男人覺得雄風轉弱，又可以飲咩湯呢？不妨試吓鹿肉首烏湯。
要咩材料？
顧名思義，鹿肉首烏湯嘅材料包括鹿肉同何首烏，前者要300克，可以喺凍肉舖搵到，後者要5錢，再加埋5至10克枸杞子，咁就可以正式開工。
點樣煲法？
先將所有材料洗乾淨，然後放入燉鍋，再加適量清水，就可以開慢火燉大約兩小時。之後加入適量調味料，即可食肉飲湯。
有乜功效？
據《醫林纂要》記載，鹿肉有「補脾胃，益氣血，補助命門火，壯陽益精」等好處，同樣地，何首烏唔止可以改善頭髮變白問題，亦有補益精血、強筋骨、補肝腎等功效。至於枸杞子除咗可以滋補肝腎、改善虛勞精虧外，仲可以增加燉湯嘅甜味呢！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
