昔日東方有性趣：巴戟熟地酒 5日速成
男子漢最忌畀人話身體孱弱，有乜嘢方法可以令人變得強壯健康？除咗作息要定時、唔好成日捱夜、做多啲運動、注意均衡飲食之外，間唔中進吓補都好重要，事關男人唔補好易冇，好似今日為大家介紹嘅巴戟熟地酒，就係一款可以幫助男人增強床上雄風嘅補酒。
有乜嘢材料？
巴戟熟地酒可以自己炮製，材料包括巴戟天60克、熟地黃45克、枸杞子30克、制附子20克、甘菊花60克、蜀椒30克，同埋醇酒1.5公升。
點樣做法？
先將上述6味藥材搗成粗粉末，放入乾淨嘅器皿，再倒入醇酒浸泡，並將開口密封，等待5日時間就可以飲用。
每次飲幾多？
正所謂「過猶不及」，補身要適可而止，所以飲補酒一定要注意分量，千祈咪過量，建議每次飲用10至20毫升，每日分兩次，早晚各一次，先將酒溫熱，空腹服用。
功效有幾大？
由於藥酒嘅主要材料都有補腎作用，其中巴戟天可以補腎陽、強筋骨；熟地黃能夠滋陰補血、益精填髓；枸杞子可以滋補肝腎、益精明目；制附子就有回陽、補腎嘅功能。換句話說，呢款巴戟熟地酒對於改善腎陽久虛、陽痿早洩、腰膝痠軟有幫助。不過，上述材料屬溫性，所以要加入性微寒又有清熱祛濕作用嘅甘菊調和一下。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
