有性趣：原味口罩有得買？

最近日本富士電視台一個節目中，揭露有唔少日本年輕女性喺網上出售用過嘅二手口罩，呢個消息一出即時成為熱話。據稱呢啲二手口罩每個可賣到約1千日圓，亦因為日本疫情嚴重，每日出門嘅話都要戴口罩，故此有唔少年輕女性便將此視為賺快錢嘅方法，甚至有人會採用面對面交收，認為咁樣能增加交易量，情況跟原味內褲等如出一轍。消息一出，即引嚟增加疫情擴散嘅擔憂，亦有人問有冇觸犯法律嘅問題。

有日本律師表示按現時法律，17歲以下人士售賣二手口罩係唔會構成違法，可能因為咁嘅緣故，故此吸引唔少年輕女性喺網上出售二手口罩。節目亦請嚟一位出售二手口罩嘅女子進行訪問，對方坦言相對賣二手內衣，賣二手口罩簡單得多。不過佢亦補充指售賣二手口罩亦係迫不得已，因為疫情導致佢失業，惟有出此下策搵生活費，否則連居住都成問題。與此同時，佢喺面售期間亦經常被對方查詢能否到酒店開房，更擔心會畀人跟蹤。