昔日東方有性趣：海參雞湯益腎強精
有冇聽過一句話叫「陸有人參，水有海參」呢？作為四大海味「鮑、參、翅、肚」嘅一種，海參一向被視為男士補身嘅佳品，《本草從新》就指出海參可以補腎益精、壯陽療痿，用嚟煲湯就最滋補，無論配搭羊肉、鴨肉、瘦肉抑或雞肉都好合適。事實上，一講到增強雄風，唔少人都會諗起飲海參雞湯，以下就話畀大家知點樣炮製：
事前要預備乜嘢材料？
第一樣嘢當然係已發好嘅海參，分量約250克，其他材料包括淮山15克、巴戟天15克、枸杞子15克、紅棗20粒同埋一隻雞。
個湯要點樣煲法？
首先，將雞放入熱水中煮20分鐘；第二步，將巴戟天、淮山、枸杞子放入煲加水煮20分鐘；第三步，將海參放入加有料酒嘅清水焯兩分鐘，焯好之後切成塊狀。跟住就將先前煮好嘅藥材、雞、海參同埋已經洗乾淨嘅紅棗放入煲裏面，加入清水煲一至兩小時。最後可以喺雞湯加鹽調味，咁就大功告成。
有乜嘢功效呢？
湯入面嘅材料，款款都有益，例如海參可以補腎益精，巴戟天有補腎陽、強筋骨嘅功效，枸杞子同樣有補益精氣嘅作用，就連紅棗都有助補虛補氣血。假如你覺得近排身體虛弱，又或者床上表現得無氣無力，呢味雞湯就最啱飲。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
