有性趣：胸圍難民 買Bra唔容易

呢位叫做Ochonoutsutsu（オチョのうつつ）嘅女漫畫家，早前分享一篇名為「胸圍難民」嘅網絡漫畫，故事講述5年前佢去到一間內衣店買Bra，當店員聽到佢想買H罩杯嘅胸圍時，即時面有難色，結果搵咗好耐，終於搵到兩個，但係款式老土。Ochonoutsutsu喺漫畫中表示其實佢已經習以為常，雖然佢一直想買款式可愛嘅Bra，但亦明白胸圍廠好少會做咁大嘅罩杯，故此喺款式上佢都已經放棄。

此外，佢又喺漫畫中表示，款式老土都算，最慘係大罩杯嘅胸圍，售價上都比一般罩杯嘅貴好幾倍，例如C罩杯胸圍售價係1,980日圓，H罩杯卻要成8,900日圓。

另外，由於下乳部分喺夏天容易積汗，所以胸圍嘅耐用性會變差，又有啲大罩杯胸圍更莫名其妙地加上托胸嘅設計，Ochonoutsutsu坦言：「唔明白個胸已經好大，仲要托高嚟做乜？」既要貴幾倍買胸圍，款式又唔係自己鍾意嘅，同時唔戴又唔得，故此佢便自稱係胸圍難民。佢嘅漫畫不但喺網上成為話題，更引嚟唔少巨乳女士留言支持添！