有性趣 ：西班牙烏蠅唔係烏蠅！

相傳西班牙烏蠅係西班牙嘅農夫，用嚟為公牛催情所使用嘅春藥，故此用喺人類身上效用更強云云。不過其實西班牙烏蠅並唔係蒼蠅，而係一種名為斑蝥嘅昆蟲，佢所分泌嘅斑蝥素具有刺激尿道，並因炎症反應而令雄性生殖器勃起，故此唔少男士將佢視為春藥。

事實上，如果斑蝥素劑量太多嘅話，不但會令腎臟及生殖器永久性損害，更由於斑蝥素毒性相當高，有資料顯示過量嘅話可令人中毒致死。雖然斑蝥嘅壯陽功效並唔可靠，亦唔應該作為春藥使用，但作為中藥嘅話，佢其實有一定嘅效用。中醫認為斑蝥「性寒，味辛，有毒。入大腸、小腸、肝、腎經」，故此古代中醫將佢用於治療頑癬、惡瘡等外用藥物。近代中醫則會用斑蝥嚟治療風濕痹痛、神經痛等。順帶一提，斑蝥喺香港跟水銀、砒霜等同屬毒性中藥，受《中醫藥條例》嚴格規管㗎！