有性趣：金雀花治腎虛陽痿

金雀花有生血草、壩齒花、金鵲花、黃雀花等別名，為豆科金雀花屬植物金雀花嘅花朵，曬乾之後就可以做藥材。從中醫角度嚟睇，其味酸、澀，性溫，歸脾、肝經，具有補腎壯陽、健脾益氣、接骨止血功效，可以治療及改善腎虛陽痿。除咗內服，亦可以外用，將金雀花磨成粉之後，可以敷於患處治療創傷出血以及跌打骨折。

唔少中醫典籍亦有記載金雀花嘅功效，如《滇南本草》稱金雀花可以補氣血，治療咳嗽、頭暈頭痛、腰膝痠痛等；而《植物名實圖考》則謂金雀花具有滋陰補陽作用。而據現代研究表示，金雀花含有豐富蛋白質、礦物質、氨基酸，具有抗炎及殺菌作用，同時亦有助增強免疫力。