有性趣：蚓蚯可以催情？

喺製作呢個香薰前，要先喺韭菜田捉49條蚯蚓，並放喺瓷碗內備用。跟住再準備鉛粉5錢、麝香5分、唵叭香及安息香各2錢。製作方法係先將鉛粉倒喺碗中蚯蚓身上，等鉛粉變成黃色後，就取出蚯蚓，然後將其他材料混合，再加入火酒磋成泥狀便可。使用方法好簡單，將佢加熱後便會散發出香氣，據稱呢種香薰具「男人聞之，其物即起，女人聞之，其心則思，香盡則止」嘅功效。

材料中嘅唵叭香，係由膽八樹果實榨油後製成嘅香料，具有辟惡氣嘅功效。至於安息香，由安息香樹樹脂製成，據唐代所編嘅《唐新修本草》稱，安息香具有行氣活血嘅作用。至於點解要用到韭菜田中嘅蚯蚓呢？原來民間偏方認為，韭菜同蚯蚓均有壯陽嘅作用，相傳有早洩問題嘅話，只需搵11條大蚯蚓洗淨後加韭菜汁製成藥丸，每日以溫酒送服，連服7日後便能久戰不洩，真係信不信由你。