有性趣：做運動影響雄風？

哥倫比亞大學喺2000年發表嘅研究發現，每星期進行3次40分鐘左右嘅跑步訓練，並配合適當體力鍛煉，人體內嘅睪固酮水平就會略為提升。至於經常坐喺度冇運動嘅男性，患勃起功能障礙嘅比例相當高，因為佢哋體內嘅睪固酮往往低於正常水平。另外，每星期跑步3小時以上嘅人，發生勃起障礙嘅風險會降低30%左右，性能力更會年輕2至5歲！

雖然做運動對提升性能力有好處，但根據最新醫學研究指出，長時間進行高強度健身運動嘅男士，性慾反而會下降，原因係過多運動會導致體內皮質醇增多，影響睪固酮分泌！換句話講，做運動要適可而止。另一方面，喺進行運動之後，身體會消耗一定能量，同樣會影響床上表現，所以應該及時補充鋅元素，例如進食蠔、貝殼類、魚、堅果、蛋等。